Revelation of John 4
Luusou no Opo Loxotolo
1 aAnu mulosilo vaivaikala ne mukalu xe eni emalei, la emaisou aitenga vile mukisi no opo loxotolo. La eni elomusou itema xolinu loxo xoolau e muvikalaleli tei muvikala aloxo 'o, “Natelo mo alosienixu mii ma'ia ane uxali manina ili'i no vaivaikala ane elosine.” 2 bEni elomusou vaivaikala ne mukalusi ka Uleenu Tavuna mu'ana'ana noxilo, la emaisou itema vile uxoxolu no luu no opo loxotolo. 3 cLa vasimolu ne kaukavuxu loxo lavo'o vevesinu xe lauolauoinu. Xe muloxu lele'e kaukavuxu vevesinu muxixaonu luu ne. 4 dMo no anu luu itemaxu vile mo tami'a ne ta tatila itemaxu vile mo tami'a a mixolu mixixaonu ne la ta tatila itemaxu vile mo tami'a ixoxolu no anu. Mo ane'i mitokolomo no anu tokolomo kea xe mitaanu kisivalu mi'oxo no anu xoulu. 5 eIa no luu ane no nixi, la lele'e ulamilami xe upaupau la luluxu uvalivalixumu. Xe no talaxu, la telu muxatele tamei ukaakaa. Anu ta ulee noxou Lataua muxatele tamei. 6 fMo no talaxu, la emaisou mii vile loxo laxalasi toxoxa'a loxo luaki mulamilami. Mo no nixi no luu ne, la eni emaisi'a ta mii tami'a mitulu mixixaonu luu ne. Ia ane'i ta mitema, ne ie'i tavu'alo misevile mutaasou vasime'a, ili'i xe u'uli. 7Vile noxi'a ne, anu iou loxo laeoni. Tameisou ne, iou loxo bulumakau mulu. Tatalusou ne iou loxo itema xe tami'asou ne, iou loxo nenusuluvi uvavava teitexi. 8 gTa mii tami'a ne, ane'i vilevilesi vivisi'a muxatele vile, mo ie'i tavu'alo mutaataasou mukalusi, mo mutaasou vivisi'a laalaaxu kalumo. Ia no aso xe no 'olovoxo, la ane'i ima'ilasou ivikala aloxo 'o uasi. Ivikala lexe,“Lataua malemalenga mo malemalenga mo malemalenga.
Anu Tila mo xaviinu musuku misevile.
Anu muxolu tei mo vaimomo 'o xe ili'i la ulivu une'e.”
9No mine ta mii ne i'itinu ualasou mo itaxaanu xe ilemo laixe noxou anu ane muxolu no luu mo umauli no voxovoxo utotomu mo kaluxu uasi, 10 hla ta tatila itemaxu vile mo tami'a italoxo ulu'elai no talaxu itema e uxolu no luu sou ilotu noxou ane umauli no voxovoxo utotomu mo kaluxu uasi. Ane'i miluvusou kisivalui'a mo mimulaxu no talaxu, la mivikala aloxo 'o.
11“Nini Tilasixe xe Lataua noxixe,
nini umomomo sou i'itinu ualasine mo itaxaneni,
xe i'osasine sou xavi noxine. Xo nini nekoinu mimii latala mukalusi
mo no anu masaxa noxine la ane'i mixali mo mixolu.”
Copyright information for
ATA